Lade Veranstaltungen

« Alle Veranstaltungen

VolXRoX

25. Februar 2022 @ 20:00-23:30

Freitag, 25. Februar 2022
VolXRoX
Plattentaufe «Zrügg uf Fäud 1»
(CH) Swiss Wörker Musig

VolXRoX feiern ihre grosse CD-Taufe mit Special Guests in der Mühle Hunziken. Aber lassen wir die Jungs doch gerade selbst sprechen:

«Mir si wider zrügg – mir si zrügg uf Fäud 1.

Vor glii drü Jahr isch üses letschte Album «Familie-Fest» usecho, u sit denn isch ungloublech viu passiert. Mir hei üs mitemne Virus umegschlage, wo üs aui zwunge het, echli umzdänke. Mir für üse Teil hei üs zrügg a üsi Afäng bsinnet, hei der aut Studio-Computer abgschtoubet und hei wider agfange, säuber Songs z’schribe und z’produziere.

I däm Prozäss isch üs ou wider klar worde dass mir e wahnsinnig viusitigi Band si. Vom Metal-Fan übere Jazz-Schüeler zum Country via Boogie-Woogie bis zum Hudigägeler fingsch aues bi üs. Und dass verschideni Stiurichtige bi öich da usse superguet achöme, wüsse mir ja no usere Zyt, wo mir no hei dörfe uf der Bühni stah. So isch üse nöi Stiu entstange: MUNDARTAINMENT!

Zäme mitem Alain ha ig im erste Lockdown innert chürzischter Zyt di erste 7 Songs gschribe. Der Alain (denn no bluetige Afänger im produziere vo Songs) het sech i sis Rüümli verzoge und het di erste Demos zämebastlet. Wo mir üs de wider mit der ganze Bänd hei dörfe träffe, hei mir zäme di Demos aglost. I vergisse das Gfüeu niemeh – das Strahle i de Ouge u di Chraft wo da plötzlech isch entstange!

Wüu das so guet klappet het in Eigeregie hei mir üs entschide, grad säuber witerzmache. Covers gstaute, Video-Dräibüecher schribe und Songs veröffentleche – für aues gits es ersts Mau. Mir si schön närvös gsii wo im Septämber 2020 der erst Song GÄGE STROM uf däm Wäg isch usecho. U dir heit üs treit – bis ganz wit füre id’Charts!

Wo di witere Songs si usecho, heit dir üs la flüge, mit HEY LATINA sogar i di offizielle CH-Single-Charts! Üsi Videos wärde meh agluegt aus vorhär und üsi #heylatinachallenge isch bi TikTok tanzet worde. Mir si öich unändlech dankbar –höret bitte niemeh uf!

Am 26. Mai 2019 hei mir üses letschte Album touft. Itze, am 25. Februar 2022, genau 1’006 Tag speter, toufe mir z’erste «Selfmade»-Album «Zrügg uf Fäud 1» – löt üs zäme la fiire!

Öie Simu & sini VolXRoXer»

Zeiten
Türöffnung: 18:30
Konzertbeginn: 20:00

Preise
Vorverkauf: CHF 38.00
Abendkasse: CHF 43.00

 Veranstaltung auf Facebook

Details

Datum:
25. Februar 2022
Zeit:
20:00-23:30